Дзёрзкі «лейтэнант упраўлення» пазваніў брастаўчаніну на WhatsApp, каб адмяніць незаконную банкаўскую аперацыю. Размова не задалася

Жыхару Брэста 31 студзеня паступіў званок на WhatsApp ад «лейтэнанта ўпраўлення», які папярэдзіў, што на ягонае прозвішча зламыснік узяў крэдыт. Далей «тэлефонны махляр» паспрабаваў выбавіць у суразмоўцы рэквізіты банкаўскіх рахункаў, але размова пайшла не па плане. Аўдыёзапіс размовы апублікаваў BrestCITY.

Вось што паведаміў брастаўчанін, які і запісаў размову:

— Учора каля 5 гадзін вечара справа была. Шкада, з самага пачатку запіс уключыць не паспеў. Прадставіўся таварыш гэты лейтэнантам нейкага ўпраўлення. Гаварыў так хутка, што я не запомніў ні яго прозвішча, ні назву ўпраўлення. Пачаў з таго, што нехта па натарыяльна заверанай даверанасці ад майго імені ўзяў крэдыт у банку.

«Лейтэнант» пацікавіўся, ці ёсць у брастаўчаніна рахункі, крэдыты, у якіх банках. Затым ахвяры мусіў пазваніць «іншы супрацоўнік», каб адмяніць усе неправамерныя дзеянні з рахункам кліента, а па факце ён паспрабаваў бы выбавіць рэквізіты банкаўскай карты альбо аформіць крэдыт.

Аднак брастаўчанін ніякіх звестак тэлефонным ашуканцам не даў, і расчараваны «лейтэнант» завяршыў размову, папярэдзіўшы суразмоўцу пра адказнасць «за разгалошванне звестак папярэдняга расследавання трэцім асобам». Больш зламыснікі «пацярпеламу» не званілі.