У СК высветлілі, хто рассылаў паведамленні пра атакі на школы ў Салігорску. Калі да яго прыйшлі сілавікі, ён вельмі здзівіўся

Па факце распаўсюду фэйкавай інфармацыі пра падрыхтоўку атак на школы Салігорска распачатая крымінальная справа, паведаміў Следчы камітэт.

Паведамленні пачалі распаўсюджвацца ў закрытых групах 12 снежня. Аператыўнікі праверылі інфармацыю і высветлілі асобу падлетка, ад імені якога публікаваліся пасты. Ім аказаўся 15-гадовы школьнік з Мінска, які ад супрацоўнікаў міліцыі «даведаўся пра нібыта падрыхтаваныя сцэнары з выкарыстаннем зброі». Як выявілася, ён стаў ахвярай сватынгу.

«Падчас агляду мабільнага тэлефона 15-гадовага падлетка выяўлена, што хлопец захапляецца камп’ютарнымі гульнямі і мае некалькі акаўнтаў у мэсэнджарах і сацыяльных сетках. Напярэдадні яму ў Telegram прыйшло паведамленне з заклікам уступіць у закрыты гульнявы чат горада Салігорска, якое ён праігнараваў. Менавіта ў гэтым канале і знойдзеныя паведамленні ад імені сталічнага школьніка пра падрыхтоўку ўзброенага нападу на мясцовыя школы», — адзначылі ў СК.

Выяўлена, што паведамленні рассылаліся з абаненцкага нумара замежнай дзяржавы, падкрэслілі ў ведамстве.

Салігорскі раённы аддзел Следчага камітэта распачаў крымінальную справу па ч.1 арт. 340 КК (Загадзя ілжывае паведамленне пра небяспеку) Крымінальнага кодэкса Рэспублікі Беларусь.

Цяпер праводзяцца следчыя дзеянні і аператыўна-вышуковыя мерапрыемствы, скіраваныя на высвятленне асобы, якая ўчыніла гэтае злачынства.

Сватынг (ад англійскай абрэвіятуры SWAT) — тактыка вымагальніцтва, якая заключаецца ва ўвядзенні міліцыі ў зман так, каб на пэўны адрас выехала штурмавая група. Гэта робіцца з дапамогай фальшывых паведамленняў пра сур’ёзныя правапарушэнні, такія як закладкі бомбы, забойства, захоп закладнікаў ці іншыя падобныя інцыдэнты.