У праграме «Арэна», якая выйшла на тэлеканале «Беларусь 1», супрацоўнік АТН, вядоўца Станіслаў Ліпскі выказаўся пра рашэнне Арыны Сабаленка прапусціць Гульні ў Парыжы.
«Камісія МАКа робіць усё, каб нашыя і расійскія атлеты ў Парыжы выглядалі максімальна незаўважна. Але, на жаль, хапае недальнабачных рашэнняў і ад саміх спартоўцаў. Арына Сабаленка вось заявіла, што не паедзе на Гульні, бо змена пакрыццяў кортаў пашкодзіць яе здароўю. Магчыма, так і ёсць, але графік у той жа першай ракеткі свету Ігі Свёнтэк не менш напружаны, а яна сваю радзіму прадставіць. Хто ведае, можа, яшчэ адной Алімпіяды ў жыцці нашай наймацнейшай тэнісісткі і не будзе», — сказаў Ліпскі.
Нагадаем, трэцяя ракетка свету Сабаленка абвясціла 17 чэрвеня, што прапусціць АГ у Парыжы праз вялікую колькасць абавязковых турніраў: «На гэтым этапе маёй кар’еры, з улікам усіх цяжкасцяў, з якімі я сутыкнулася ў апошнія месяцы, мне трэба паклапаціцца пра сваё здароўе. Гэта (Алімпіяда). — Заўв. рэд.) для мяне занадта, улічваючы графік. Таму я прыняла рашэнне надаць увагу свайму здароўю».
У кар’еры Арыны да гэтага была адна Алімпіяда — у Токіа ў 2021-м яна вылецела ў другім крузе.
Дагэтуль не вядома, ці згуляе на грунтовых кортах у Парыжы Вікторыя Азаранка (16-я ў рэйтынгу адзіночнага разраду).
На апошнім турніры ў Берліне, дзе выступалі наймацнейшыя беларускія тэнісісткі, Сабаленка знялася падчас чвэрцьфінальнага матча праз траўму, а Азаранка саступіла ў паўфінале.