Расійскіх артыстаў сёлета стала значна менш або яны зусім зніклі з рэйтынгаў самых папулярных выканаўцаў у постсавецкіх краінах, піша РБК.
У 2023 годзе пазіцыі выканаўцаў з Расіі пачалі аднаўляцца пасля спаду ў 2022-м, да канца мінулага года яны займалі больш чым палову месцаў у топ-10 самых папулярных кампазіцый у сэрвісе Apple Music амаль ва ўсіх былых рэспубліках СССР. Аднак на канец 2024-га ў некаторых краінах у такіх рэйтынгах расійскія музыкі адсутнічаюць зусім. Пра гэта сведчаць штосутачныя рэйтынгі платформы Apple Music.
Прычым у снежні 2024 года папулярнасць расійскіх музыкаў у постсавецкіх краінах упала нават ніжэй за паказчыкі аналагічнага перыяду 2022-га, калі іх прысутнасць у топ-10 у многіх краінах сур’ёзна скарацілася. Так, на канец 2024-га ў Літве, Беларусі і Украіне выканаўцы з Расіі не занялі ніводнай пазіцыі ў топ-10.
У папярэднія гады расіяне стабільна траплялі ў спіс самых праслухоўваных спевакоў у Беларусі. Напрыклад, у 2021-м у беларускім топ-10 папулярных кампазіцый на сэрвісе Apple Music было сем песняў выканаўцаў з Расіі, у 2022-м — тры, у 2023-м — дзевяць (гэта больш, чым ва ўсіх астатніх постсавецкіх краінах), а ў 2024-м — нуль.
Адзначаецца, цяпер увесь рэйтынг самых папулярных песняў у Беларусі на гэтым сэрвісе прадстаўлены паўднёвакарэйскай музыкай, пераважна кампазіцыямі вакаліста бой-бэнда BTS Чыміна. Тым часам у большасці іншых постсавецкіх краін мінімум траціну рэйтынгу займаюць песні амерыканскіх выканаўцаў.
Расійскія эксперты лічаць, што скарачэнне папулярнасці музыкаў з РФ у постсавецкіх краінах звязанае са зніжэннем іх рэдакцыйнай падтрымкі на міжнародных музычных сэрвісах, а таксама з абмежаваннямі ў канцэртнай дзейнасці артыстаў.