У Мінску ўзялі пад ахову балота. Вас здзівіць яго месцазнаходжанне

Па рашэнні Мінскага гарвыканкама адміністрацыі Маскоўскага раёна перададзенае пад ахову балота ў паўднёвай частцы Мінска. Участак уяўляе сабой тыповы біятоп, там растуць рэдкія расліны, паведамляе Мінскі гарадскі камітэт прыродных рэсурсаў і аховы навакольнага асяроддзя.

Балота знаходзіцца ў незвычайным месцы: ля перасячэння МКАД і трасы на Брэст, прычым літаральна на скрыжаванні — у адным з «пялёсткаў» дарожнай развязкі. Гэта круглы ўчастак плошчай 1,28 гектара.

Узяць пад ахову ўчастак вырашылі таму, што ён уяўляе сабой тыповы біятоп пераходнага балота. Тыповы біятоп — гэта ўчастак з аднароднымі экалагічнымі ўмовамі, дзе жывуць пэўныя віды жывёл і раслін, які адлюстроўвае характэрныя асаблівасці прыроды Беларусі.

У гэтым выпадку тыповым біятопам прызнанае пераходнае балота. Ахова такіх тэрыторый, згодна з Дырэктывай Еўрапейскага саюза аб месцапражываннях, важная для захавання прыроды і біяразнастайнасці Еўропы.

На мінскім балоце, унутры маленькага «пялёстка» МКАД, растуць рэдкія і амаль зніклыя віды раслін, якія ахоўваюцца не толькі ў Беларусі, але і ў Еўропе і свеце. Так, там растуць вярба чарнічная і ладдзян трохнадрэзаны, уключаныя ў Чырвоную кнігу Беларусі, а таксама чатыры віды, якія патрабуюць прафілактычнай аховы: пальчатакарэннік мяса-чырвоны, пальчатакарэннік даўгалісты, гайнік балотны, чараўнік двухлісты.

«Таму гэты прыродны комплекс з’яўляецца ўнікальным для біялагічнай разнастайнасці не толькі горада Мінска, але і краіны ў цэлым. Яго ахова дазволіць захаваць месцы вырастання рэдкіх і амаль зніклых відаў раслін, што дазволіць зберагчы прыроднае багацце», — адзначылі ў Камітэце прыродных рэсурсаў.

На ўчастку, узятым пад ахову, будзе абмежаваная любая дзейнасць, якая парушае прыродную раўнавагу. Нельга будзе праводзіць работы, звязаныя са змяненнем рэльефу і наяўнага гідралагічнага рэжыму, скідаць туды сцёкавыя, дрэнажныя, кар’ерныя воды, пашкоджваць расліннасць, травяное покрыва, уладкоўваць месцы адпачынку, ставіць палаткі, выкарыстоўваць механічны транспарт.