Для абвінавачаных па справе «Вясны» запатрабавалі тэрміны. Нобелеўскаму лаўрэату Бяляцкаму просяць больш за ўсіх — 12 гадоў

Абвінавачанне просіць для праваабаронцаў «Вясны» пакаранне ў выглядзе пазбаўлення волі на тэрміны ад 9 да 12 гадоў у калоніі ўзмоцненага рэжыму. Пра гэта паведамляе праваабарончы цэнтр «Вясна».

Пракурор Аляксандр Кароль просіць для Алеся Бяляцкага пазбаўленне волі тэрмінам на 12 гадоў, для Уладзіміра Лабковіча — 9 гадоў, для Валянціна Стэфановіча — 11 гадоў.

Для праваабаронцы Дзмітрыя Салаўёва, які цяпер знаходзіцца за мяжой, абвінавачванне запатрабавала 10 гадоў пазбаўлення волі.

Нагадаем, 5 студзеня ў судзе Ленінскага раёна Мінска пачаўся разгляд крымінальнай справы супраць прадстаўнікоў праваабарончага цэнтра «Вясна» — лаўрэата Нобелеўскай прэміі міру, кіраўніка арганізацыі Алеся Бяляцкага, яго намесніка Валянціна Стэфановіча і каардынатара кампаніі «Праваабаронцы за свабодныя выбары» Уладзіміра Лабковіча. Пры гэтым усе тры фігуранты не прызналі віны ні па адным з артыкулаў КК, якія ім інкрымінуюць. Іх абвінавачваюць у кантрабандзе, арганізацыі і падрыхтоўцы дзеянняў, якія груба парушаюць грамадскі парадак.