Беларусы перажывалі, што іх блізкіх тэрмінова забралі на вайсковыя зборы без дадатковых рэчаў і сродкаў гігіены. Мінабароны адказала

У канцы тыдня пачалі прыходзіць навіны пра тое, што ў некаторых рэгіёнах Брэсцкай вобласці ў аўральным парадку ваеннаабавязаных забіраюць на зборы. Паводле чытачоў, перад адпраўкай хтосьці не паспеў нават забегчы дадому, каб узяць рэчы і сродкі асабістай гігіены. Аднак, як расказаў намеснік камандзіра брыгады па тыле гвардыі палкоўнік Дзям’ян Яшчук, «па прыбыцці ваеннаабавязаныя былі экіпіяваныя». Інфармацыя пра гэта з’явілася ў тэлеграм-канале Мінабароны.

У пачатку тыдня брастаўчанін паведаміў, што на працы яго сыну ўручылі позву і папрасілі зайсці ў ваенкамат на зверку звестак. Працэдура, як тлумачыў мужчына, мусіла заняць паўгадзіны. Аднак пазней сын паведаміў бацьку, што ў ваенкамаце даведаўся: ён едзе на зборы.

— Пакуль сын быў на сувязі, расказваў, што пры ім чалавек 400 пасадзілі ў аўтобусы і адправілі кудысьці ў кірунку Гродна. У людзей з сабой нічога няма, ні сродкаў, ні гігіены, у многіх праца, нейкія справы, — апісваў сітуацыю мужчына.

У суботу тэлеграм-канал Мінабароны са спасылкай на намесніка камандзіра па тыле — начальніка тылу 11-й гвардзейскай механізаванай брыгады Заходняга аператыўнага камандавання Дзям’яна Яшчука паведаміў, што «ваеннаабавязаныя былі экіпіяваныя». 11-я асобная гвардзейская механізаваная брыгада базуецца ў Слоніме.

— Па прыбыцці ім выдадзеныя прадметы рэчавай маёмасці першай катэгорыі, цеплаізаляцыйныя дыванкі, спальныя мяшкі, — расказаў Дзям’ян Яшчук. — Арганізаванае размяшчэнне ваеннаабавязаных у казармах, спартзале, навучальным корпусе, клубе. Харчуюцца яны ў дзвюх сталовых РУП ТПУ пры Міністэрстве абароны. Пры перамяшчэнні на палігоны і ўчасткі мясцовасці харчаванне ваеннаабавязаных будзе арганізаванае на тэхнічных сродках харчовай службы брыгады. Размяшчэнне — на намётавым фондзе з выкарыстаннем тэрмаізаляцыйны дыванкоў і спальных мяшкоў.

Паводле афіцэра, створаны ў брыгадзе запас дазваляе ажыццявіць планавы прыём ваеннаабавязаных.

Нагадаем, 3 красавіка ў Беларусі на даручэнне Аляксандра Лукашэнкі пачалі праверку баявой гатоўнасці Узброеных сіл Рэспублікі Беларусь. Такая праверка праходзіла ў снежні 2022 года, а да гэтага — у траўні мінулага года.