Прэзідэнт Венесуэлы Нікалас Мадура абвясціў частку суседняй дзяржавы 24-м штатам краіны

Прэзідэнт Венесуэлы Нікалас Мадура абвясціў заходнюю частку суседняй Гаяны — Эсэкіба — 24-м штатам краіны. Ён заклікаў Нацыянальную асамблею Венесуэлы прыняць закон пра абарону спрэчнай тэрыторыі, піша выданне Ultimas Noticias.

«Новы штат» Венесуэлы атрымаў назву Гаяна-Эсэкіба. Мадура прапанаваў стварыць на далучанай тэрыторыі падраздзяленні ведамстваў, якія выдаюць ліцэнзіі на здабычу газу, нафты і карысных выкапняў. Нафтавым кампаніям, якія працуюць у «новым штаце», ён даў тры месяцы на завяршэнне аперацый.

«Толькі па-добраму. З павагай да міжнароднага права, з павагай да законаў, з павагай добрасуседства», — сказаў Мадура.

Ён таксама даручыў стварыць вярхоўны камісарыят па абароне Эсэкіба, распрацаваць план сацыяльнай дапамогі насельніцтву рэгіёна, а таксама правесці перапіс і выдаць яго жыхарам пасведчанні асобы. Таксама Мадура запатрабаваў апублікаваць і распаўсюдзіць у адукацыйных установах новую карту Венесуэлы.

Нагадаем, 3 снежня ў Венесуэле прайшоў рэферэндум, па выніках якога каля 95% грамадзян Венесуэлы прагаласавала за ўключэнне Эсэкіба ў склад краіны, насуперак рашэнню Міжнароднага суда ААН, які прадпісваў Каракасу ўстрымацца ад любых дзеянняў па змене сітуацыі ў тэрытарыяльнай спрэчцы з Гаянай.

Што за Гаяна?

Гуаяна-Эсэкіба (таксама Заходняя Гаяна) — спрэчная тэрыторыя на захадзе сучаснай Рэспублікі Гаяна, у басейне ракі Эсэкіба. Доўгая тэрытарыяльная спрэчка незалежнай Венесуэлы пачалася яшчэ ў XIX стагоддзі спачатку з Брытанскай імперыяй, а затым працягнулася і з незалежнай Гаянай. Плошча вобласці — амаль 160 000 км², насельніцтва — каля 300 000 чалавек.

У Венесуэле зноў актыўна загаварылі пра «ўз'яднанне» пасля выяўлення ў тэрытарыяльных водах Гаяны вялікіх запасаў нафты. Улады краіны хочуць прыцягнуць да іх распрацоўкі амерыканскія і кітайскія кампаніі.

Прэзідэнт Венесуэлы Нікалас Мадура, якога шмат хто ў свеце лічыць дыктатарам, а Аляксандр Лукашэнка называе сваім сябрам, агрэсіўна выказваўся на адрас Гаяны, заявіўшы, што тая выбрала шлях «эскалацыі вайны».