СМІ: Расія эвакуюе вайсковы флот з Сірыі пасля наступу паўстанцаў

Расія пачала выводзіць караблі з ваенна-марской базы ў сірыйскім Тартусе пасля хуткага прасоўвання па Сірыі паўстанцаў-ісламістаў, якіх не можа стрымаць армія прэзідэнта Башара Асада, паведамляе Naval News. Увагу на публікацыю звярнула выданне The Moscow Times.

Паводле звестак Naval News, раніцай 2 снежня танкер «Ельня», які важны для падтрымання расійскіх сіл у Міжземным моры, пакінуў Тартус. Разам з ім базу маглі пакінуць іншыя судны. Усяго ваенна-марская групоўка Расіі ў Сірыі налічвае пяць караблёў і адну падводную лодку. У іх лік уваходзяць два фрэгата класа «Адмірал Гаршкоў», адзін фрэгат класа «Адмірал Грыгаровіч», палепшаная падводная лодка класа «Кіла» і два дапаможныя судны.

«Існуе рэальная імавернасць таго, што адыход звязаны з пагаршэннем сітуацыі ў Сірыі», — піша ваенна-марскі аналітык Droxford Maritime. Пасля вываду расійскіх караблёў ваенна-марская база ў Тартусе можа быць закінутая, а самі караблі Расія з вялікай доляй імавернасці адправіць у Балтыйскае мора, мяркуе Naval News. Па дарозе яны могуць спыняцца ў Алжыры ці Лівіі. Пры гэтым, калі Расія вырашыць захаваць за сабой базу ў Тартусе, ёй давядзецца адправіць туды вялікае падмацаванне, але на яго перакідванне пойдуць тыдні, падкрэслівае Naval News.

Ваенна-марская база ў Тартусе на міжземнаморскім узбярэжжы Сірыі — стратэгічны аб’ект для Расіі. Ваенна-марскі флот СССР базаваўся ў гэтым месцы з 1971 года, але пасля распаду краіны караблі былі выведзеныя. Расійскія вайскоўцы вярнуліся ў Тартус у 2012 годзе, калі Масква вырашыла ўмяшацца ў грамадзянскую вайну ў Сірыі і выступіла на баку прэзідэнта Башара Асада. Перад уварваннем ва Украіну Расія ўзмацніла сваю вайсковую прысутнасць у Тартусе, каб супрацьстаяць авіяносцам NATO ў Міжземным моры.

Чытайце таксама