Выкід сонечнай масы, які адбыўся пасля ўспышкі на Сонцы 29 траўня, закране Зямлю і, хутчэй за ўсё, выкліча магнітныя буры. Амерыканскія і расійскія навукоўцы прагназуюць з’яўленне паўночнага ззяння.
«Узровень G2 магчымы з 31 траўня на 1 чэрвеня», — гаворыцца ў паведамленні Цэнтра прагназавання касмічнага надвор’я (SWPC) ЗША.
«На піку магчымы ўзровень да G2. Каля 15% складае імавернасць бураў узроўню G3. У базавым сцэнары выключна высокія імавернасці палярных ззянняў у ноч з пятніцы на суботу», — пацвердзілі ў лабараторыі сонечнай астраноміі і геліяфізічнага прыборабудавання ІКІ РАН і ІСЗФ з Расійскай акадэміі навук.
Ступень хвалявання магнітнага поля Зямлі на ўзроўні G2 азначае «ўмерана» паводле шкалы маніторынгу з пяці паказчыкаў, дзе G5 — «экстрэмальна моцна», а G1 — «слаба».
Узровень G2 азначае, што на зямлі могуць узнікнуць праблемы ў энергетычных сістэмах. Таксама магчымыя перабоі ў радыёнавігацыі, парушэнні высокачастотнай радыёсувязі.
Нагадаем, папярэдняя магнітная бура, якая ўпершыню за 20 гадоў дасягнула найвышэйшага ўзроўню G5, была зафіксаваная на Зямлі 11 траўня.