У аўторак, 14 студзеня, дзяржаўныя газеты апублікавалі перадвыбарныя праграмы ўсіх пяці кандыдатаў у прэзідэнты Беларусі. У праграме Аляксандра Лукашэнкі звяртае на сябе ўвагу не тэкст, а фота: рэтуш заўважная нават голым вокам. Прапануем параўнаць, як насамрэч цяпер выглядае кандыдат Лукашэнка і якім яго вырашыў паказаць ягоны перадвыбарчы «штаб».
Сама перадвыбарная праграма называецца «Время выбрало нас». Убачыць яе можна у папяровых версіях дзяржаўных газет «Звязда» і «Рэспублiка», а таксама ў вэб-версіі «Звязды» на сайце выдання. У тэксце праграмы Лукашэнка ў асноўным паўтарае ідэі, якія ўжо шмат разоў агучваў раней: ля межаў войскі NATO, краіну спрабуюць «разгайдаць знутры», трэба аб’яднацца і пастарацца «захаваць краіну».
А вось фота — гэта, відаць, новы ўзровень рэтушы. Рэдактары адкрыта перастараліся з фоташопам і «амаладзілі» Лукашэнку гадоў на 20.
Дзяржаўныя СМІ часта паказваюць Аляксандра Лукашэнку свяжэйшым, чым ён выглядае насамрэч (прычым часам відавочна перагінаюць).
На фотаздымках з мінулых перадвыбарных праграм ён таксама выглядае маладзейшым за свой узрост. Але не настолькі: да 2025 года кандыдат нібыта пачаў свяціцца.
А як Лукашэнка выглядае насамрэч?
ДзяржСМІ і прэс-служба часта «падпраўляюць» фота Лукашэнкі (і не толькі яго). Аднак рэальны выгляд палітыка можна ўбачыць на відэа, а таксама на фота замежных карэспандэнтаў.
Ніжэй — некалькі выяваў палітыка за апошнія месяцы.
Хто яшчэ ідзе на выбары
Нагадаем, усяго ў Беларусі зарэгістравалі пяць кандыдатаў на блізкіх выбарах: «чацвёрка для біцця» і Аляксандр Лукашэнка. Кандыдаты-спойлеры — гэта старшыня Ліберальна-дэмакратычнай партыі Алег Гайдукевіч, індывідуальная прадпрымальніца Ганна Канапацкая, першы сакратар ЦК Камуністычнай партыі Сяргей Сыранкоў і кіраўнік Рэспубліканскай партыі працы і справядлівасці Аляксандр Хіжняк.
Спойлеры могуць выконваць розныя функцыі, напрыклад, заблытваць выбаршчыка, перашкаджаць іншым з шанцамі на перамогу ці проста быць у спісе для колькасці (гэты варыянт акурат і будзе ў Беларусі на сёлетніх выбарах). Нікога з зарэгістраваных кандыдатаў-спойлераў нельга назваць незалежнымі і рэальнымі супернікамі для Лукашэнкі, а Сяргей Сыранкоў наогул ідзе на выбары з лозунгам «Не вместо Лукашенко, а вместе с президентом».
