Аўстрыйскі дрэваапрацоўчы холдынг Kronospan пазбавіўся ад свайго бізнесу ў Беларусі, даведаўся Office Life. Новым уладальнікам яго заводаў і лагістычных цэнтраў стаў эмірацкі фонд Causa Foundation, а кіраванне бізнесам перадалі расійскім менеджарам.
Юрыдычныя асобы, якім належалі заводы Kronospan у Беларусі, завяршылі рэбрэндынг. Прадпрыемствамі ў Смаргоні цяпер кіруюць кампаніі «Ультрадекор», «Ультрадекор Пропертиз» і «Ультрадекор НТ», у Віцебску — «Ультрабилд», пад Магілёвам — «Ультрабилд Стил» і «Ультра Плай ОСБ». Перайменаваныя і іншыя мясцовыя юрыдычныя асобы.
Выхад Kronospan з беларускага бізнесу адбыўся ў пачатку восені мінулага года. Да гэтага аўстрыйцы завяршылі працэс перадачы таму ж Causa Foundation сваіх актываў у Расіі. Фонд зарэгістраваны ў ААЭ.
Kronospan выйшаў на беларускі рынак у канцы 2000-х гадоў і стаў найбуйнейшым інвестарам у мясцовую дрэваапрацоўку. Яго прадпрыемствы выпускалі тут драўняныя пліты, падлогавае пакрыццё, смолы, лакі, спецыяльную паперу, сталёвыя канструкцыі і інш. Значная частка прадукцыі прызначалася на экспарт. Агульны аб’ём інвестыцый Kronospan у эканоміку Беларусі ацэньваўся прыблізна ў 1 млрд еўра.
У сакавіку 2017 года Аляксандр Лукашэнка наведваў вытворчасць кампаній «Кронохем» і «Кроноспан ОСБ», калі быў з рабочай паездкай у Магілёўскай вобласці. Тады ён заяўляў, што «хацелася б, каб у нас больш было такіх прадпрыемстваў». «Мне з вамі лёгка размаўляць, і хай мяне пачуюць тыя крытыкі, якія наваліліся на мяне, калі мною было прынятае рашэнне па мадэрнізацыі дрэваапрацоўчых прадпрыемстваў», — казаў палітык.
Адзначым, што яшчэ вясной мінулага года, пасля таго, як было прынятае рашэнне перадаць расійскі бізнес Kronospan мясцоваму менеджменту, гаварылася пра тое, што прадпрыемствы ў Беларусі працягнуць весці свой бізнес у складзе Kronospan.
Беларускія прадпрыемствы Kronospan былі ўключаныя ў спіс забароненых да продажу без узгаднення з урадам актываў з «недружалюбных» краін.
Чытайце таксама
