Урад увёў чарговыя змяненні для гандлю, яны датычаць дзяржрэгулявання цэн. Для адных тавараў узмацнілі кантроль іх цаны, а для іншых — паслабілі. Новаўвядзенні прынялі для таго, каб падтрымаць беларускіх вытворцаў і павялічыць продажы іх тавараў, удакладняе Саўмін. «Люстэрка» тлумачыць, што змянілася.
Якія новаўвядзенні з’явіліся для рознічнага гандлю
Улады ўзяліся актыўней рэгуляваць цэны на свежыя агуркі, яблыкі, рэпчатую цыбулю, белакачанную капусту, а таксама бульбу, сталовыя буракі, моркву (апошнія тры пазіцыі — за выключэннем мытага тавару).
Так, для гэтых тавараў абнавілі памежныя максімальныя адпускныя цэны, а таксама столь па рознічных — то-бок тых, якія бачаць пакупнікі ў крамах. Прычым абмежаванні прапісалі па месяцах — да траўня 2025 года ўключна. Раней чыноўнікі ўжо вызначалі рознічныя абмежаванні што да цэн на гэтыя тавары.
Да прыкладу, у кастрычніку гэтага года бульбу можна прадаваць у крамах не даражэй за 1 рубель за кілаграм, а ў траўні 2025-га — 1,16 рубля. Што да яблыкаў, то ў гэтым месяцы максімальная рознічная цана на іх можа даходзіць да 3,89 рубля, у лістападзе — да 6,58 рубля, у снежні — да 8,85 рубля, у студзені 2025-га — да 8,61 рубля, у лютым — да 8,4 рубля, а далей яны павінныя таннець. Да прыкладу, у траўні наступнага года цэнавая столь у розніцы па іх запланаваная на ўзроўні 4,69 рубля.
Што гэта значыць для пакупнікоў? Так, цана гэтых тавараў у крамах не можа перавышаць усталяванай столі па цэнах.
Што змянілі для імпарцёраў
Урад знізіў для імпарцёраў памежныя максімальныя надбаўкі для некаторых тавараў. Да прыкладу, на грэчку гэтую столь апусцілі да 10% (раней — 15% пры продажы ў сваіх крамах пастаўшчыка, 25% — ва ўсіх астатніх).
Для імпарцёраў таксама знізілі памежныя максімальныя надбаўкі на макарону з пшаніцы, сокі, нектары, панчошна-шкарпэткавыя вырабы, керамічную плітку, зубную пасту.
Але гэта змяненне не значыць, што рознічныя цэны на тавары прапарцыйна знізяцца. На практыцы, да прыкладу, можа вырасці закупачная цана грэчкі або зубной пасты, і нават калі імпарцёр выкарыстае што да яе зрэзаную надбаўку, у розніцы гэтыя тавары могуць усё роўна падаражэць. Прычына — істотны рост закупкавай цаны.
Што адкарэктавалі для тавараў раскошы і прэміум-класа
«Выведзеныя з цэнавага рэгулявання тавары высокага цэнавага сегменту, якія адносяцца да тавараў раскошы і прэміум-класа», — паведамляе ўрад.
Сярод іншага гэта парфумерыя і касметыка (да прыкладу, Azzaro, Chanel, Hugo Boss, Versace), адзенне (у тым ліку Dolce & Gabbana, Giorgio Armani, Hugo Boss, Max Mara, Prada).
Таксама скасавалі дзяржрэгуляванне цэн на некаторыя шыны і покрыўкі. Сярод іншага гэта Continental, Michelin, Pirelli, Yokohama.
Колькі часу ў гандлю, каб змяніць цэны на рэшткі тавараў?
Цэны на тавары, для якіх увялі змяненні па дзяржрэгуляванні, трэба падагнаць пад новыя патрабаванні да 25 кастрычніка.
Чытайце таксама
