У кіроўцаў маршрутак, якія парушаюць правілы дарожнага руху, хочуць забіраць аўто. Пра гэта расказаў БЕЛТА першы намеснік начальніка транспартнай інспекцыі Міністэрства транспарту і камунікацый Юрый Касцюк.
Паводле чыноўніка, праца ў гэтым кірунку ўжо вядзецца.
— На жаль, не ўсе рэагуюць на штрафы, тым больш на папярэджанні. Так што забіранне транспартнага сродку — вымушаная мера. Праца ў гэтым кірунку вялася ўжо даўно: рыхтаваліся адпаведныя дакументы. Усё гэта робіцца не для таго, каб стварыць перавозчыкам праблемы, а каб упарадкаваць дзейнасць тых, хто займаецца нядобрасумленнай канкурэнцыяй, у тым ліку эканомячы на бяспецы, — падкрэсліў Юрый Касцюк. — Цяпер мы гаворым не пра канфіскацыю аўтамабіля, а менавіта пра забіранне. На які тэрмін — вырашыць суд. Магчыма, на месяц ці больш.
Нагадаем, за апошні час у Беларусі адбылося некалькі буйных аварый з удзелам маршрутак.
20 лютага ў Смалявіцкім раёне сутыкнуліся гружаны пяском МАЗ і маршрутнае таксі. У ДТЗ загінулі 11 чалавек, дзевяць — шпіталізаваныя.
24 лютага ў Магілёўскай вобласці на трасе Бабруйск — Глуск сутыкнуліся маршрутка і трактар. Пацярпелі 12 чалавек, дзевяць чалавек шпіталізавалі, траім аказалі першую дапамогу і апусцілі. Загінулых няма.
У гэты ж дзень адбылося яшчэ адно ДТЗ з удзелам маршрутнага таксі. У Лідскім раёне маршрутка ўрэзалася ў адбойнік. Чатыры пасажыры былі прышпіленыя рамянямі бяспекі, таму сур’ёзных траўмаў не атрымалі. У ДАІ адзначылі, што гума на ўсіх колах была са зношаным пратэктарам і не адпавядала ПДР.
Пасля гэтага МУС і Мінтранс абвясцілі пра рэйды ў дачыненні да маршрутак. Інспектары ДАІ правяраюць у кіроўцаў допуск да ўдзелу ў дарожным руху або дакументы, якія дазваляюць ажыццяўляць паслугі па перавозцы пасажыраў. Таксама надаюць увагу перавышэнню хуткаснага рэжыму і выяўленню магчымых фактаў пераабсталявання транспартных сродкаў шляхам павелічэння колькасці пасадачных месцаў, не прадугледжаных канструкцыяй аўтамабіля.
