Праваабаронцы паведамляюць, што 4 і 5 сакавіка ў Мінскай вобласці супрацоўнікі КДБ праводзілі аблавы і затрыманні праз інцыдэнт на вайсковым аэрадроме ў Мачулішчах.
Паводле звестак праваабарончага цэнтра «Вясна», супрацоўнікі КДБ затрымліваюць усіх, «хто засвяціўся па адміністрацыйна-палітычных артыкулах з 2020 па 2023 год».
Паведамляецца, што пасля ператрусаў людзей вязуць у СІЗА КДБ. Праваабаронцам вядома не менш чым пра дзесяць такіх выпадкаў.
Што адбылося
Нагадаем, раніцай 26 лютага ў ваколіцах вайсковага аэрадрома 50-й змяшанай базы Ваенна-паветраных сіл Беларусі ў Мачулішчах (Мінскі раён) мясцовыя жыхары пачулі некалькі выбухаў. Паводле BYPOL, яны сталі вынікам атакі дрона беларускіх партызан на расійскі ваенны самалёт далёкага радыёлакацыйнага выяўлення і кіравання (ДРЛВ) А-50. Як заявіў кіраўнік аб’яднання былых сілавікоў Аляксандр Азараў, самалёт, які ўдзельнічаў у карэктаванні расійскіх ракетных удараў па тэрыторыі Украіны, быў пашкоджаны і «лётаць ужо не зможа».
Пасля гэтага з’явіліся паведамленні, што на мяжы зрабілі больш жорсткім памежны кантроль, а ў вышук абвясцілі выхадца з Крыма, якога называюць датычным да гэтага інцыдэнту. Акрамя таго, у Беларусі пачалі правяраць уладальнікаў дронаў.
Пазней расследавальнікі з Bellingcat параўналі зробленыя 28 лютага і 19 лютага спадарожнікавыя здымкі самалёта і адзначылі «розніцу ў колеры крылаў». Яны дадалі, што гэта можа быць праз снег, таму «пакуль немагчыма праверыць сцверджанні BYPOL».
У BYPOL у адказ на гэта расказалі, як і чым быў атакаваны расійскі самалёт.
У чацвер, 2 сакавіка, беларускія дзяржСМІ апублікавалі відэа палёту самалёта А-50 з бартавым нумарам 43. Прапагандысты паведамілі, што борт «цэлы, непашкоджаны і нясе службу ў звычайным рэжыме» і ў адпаведнасці з планам «здзейсніў аблёт дзяржаўнай мяжы ў групе і суправаджэнні іншых самалётаў». Тэлеграм-канал прэс-службы Лукашэнкі ўвогуле заявіў, што А-50 суправаджаў «борт № 1».
Пад выглядам супрацоўніцы беларускага аэрадрома ў Мачулішчах, дзе базаваўся А-50, журналістка «Люстэрка» патэлефанавала на Таганрогскі авіяцыйны навукова-тэхнічны комплекс імя Г. М. Берыева. У яго склад уваходзіць 325-ы Авіяцыйны рамонтны завод, які займаецца аднаўленнем такой тэхнікі. У прыёмным пакоі адзначылі, што самалёт з бартавым нумарам 43 паступіў да іх.