Каля 13.30 22 чэрвеня ў Баранавіцкім раёне здзейсніў «жорсткую пасадку» верталёт Мі-24, паведамілі ў Мінабароны.
Члены экіпажа верталёта атрымалі цялесныя пашкоджанні, разбурэнняў і пацярпелых на зямлі няма.
Прычыны здарэння высвятляе камісія.
Паводле звестак праекта «МотолькоПомоги», верталёт упаў ля трасы М1 паміж Івацэвічамі і Баранавічамі. На месцы працуе МНС. Як сцвярджае выданне, верталёт належыць Ваенна-касмічным сілам Расіі. У прэс-рэлізе Мінабароны Беларусі прыналежнасць паветранага судна не ўдакладняецца.
Выданне «Виртуальный Брест» апублікавала відэа, знятае за некалькі секунд да жорсткай пасадкі верталёта. На роліку відаць, як Мі-24 пралятае над трасай і хаваецца за верхавінамі дрэваў.
— Верталёт, карацей, зваліўся на трасе, — пракаментаваў убачанае аўтар відэа.