У Міністэрстве абароны Расіі зрабілі справаздачу пра ўзяцце наймітамі ПВК Вагнера трох гарадскіх кварталаў у Бахмуце. Ва ўкраінскім Генштабе паведамілі, што на Бахмуцкім напрамку расійскія сілы таксама спрабавалі наступаць у раёне населенага пункта Багданаўка. У Інстытуце па вывучэнні вайны кажуць, што расійскія сілы кантралююць 76,5% тэрыторыі Бахмута.
Расказваем пра галоўнае са зводак штабоў і высноваў экспертаў на 413-ы дзень вайны ва Украіне.
Генштаб УСУ: Жорсткія баі ідуць за Мар'інку
Расійскія войскі працягваюць засяроджваць асноўныя намаганні на вядзенні наступальных дзеянняў на Ліманскім, Бахмуцкім, Аўдзееўскім і Мар'інскім напрамках. За мінулыя суткі УСУ адбілі 72 атакі праціўніка на названых напрамках, паведамляе Генштаб у ранішняй зводцы.
— За мінулыя суткі расіяне нанеслі адзін ракетны і 21 авіяцыйны ўдар, правялі 33 абстрэлы з рэактыўных сістэм залпавага агню па пазіцыях украінскіх войскаў і цывільнай інфраструктуры населеных пунктаў краіны.
— На Валынскім, Палескім, Северскім і Слабажанскім напрамках аператыўная абстаноўка без істотных зменаў. За мінулыя суткі расійскія войскі абстралялі 16 населеных пунктаў.
— На Купянскім напрамку абстрэлам праціўніка падвергліся 11 населеных пунктаў.
— На Ліманскім напрамку расіяне вялі беспаспяховыя наступальныя дзеянні паблізу населеных пунктаў Белагораўка і Спірнае. Артылерыйскім абстрэлам падвергліся шэсць населеных пунктаў.
— На Бахмуцкім напрамку расійскія сілы працягваюць весці наступ, спрабуючы ўзяць пад поўны кантроль Бахмут. Праціўнік таксама спрабаваў наступаць недалёка ад населенага пункта Багданаўка. Ад абстрэлаў пацярпелі 18 населеных пунктаў.
— На Аўдзееўскім і Мар'інскім напрамках расійскія войскі наступалі ў раёнах населеных пунктаў Аўдзееўка, Першамайскае, Невельскае і Мар'інка Данецкай вобласці, поспеху не мелі. Самыя жорсткія баі ідуць за Мар'інку. Абстрэлам падвергліся 12 населеных пунктаў.
— На Шахцёрскім напрамку цягам мінулых дзён расіяне наступальных дзеянняў не вялі, абстралялі шэсць населеных пунктаў.
— На Запарожскім і Херсонскім напрамках расійскія сілы працягваюць абараняцца. За мінулыя суткі праціўнік абстраляў больш за 30 населеных пунктаў.
— Авіяцыя Сіл абароны за дзень нанесла 13 удараў па раёнах канцэнтрацыі асабовага складу і ваеннай тэхнікі расійскіх войскаў.
— Збітыя два БПЛА тыпу «Арлан-10».
Падраздзяленні ракетных войскаў і артылерыі цягам сутак нанеслі ўдары па пяці раёнах канцэнтрацыі жывой сілы, узбраення і ваеннай тэхнікі, а таксама дзвюх станцыях радыёэлектроннай барацьбы праціўніка.
Мінабароны Расіі: Ракетныя войскі і артылерыя абстралялі Бахмут за суткі 52 разы
У Міністэрстве абароны Расіі заявілі пра знішчэнне пяці ўкраінскіх дыверсійна-разведвальных груп: трох — на Купянскім і дзвюх — на Паўднёва-Данецкім напрамку.
— На Купянскім напрамку авіяцыя і артылерыя Заходняй групоўкі войскаў пабілі падраздзяленні УСУ ў раёнах населеных пунктаў Першатраўневае і Бераставое Харкаўскай вобласці, Стальмахоўка Луганскай вобласці. Акрамя таго, у раёнах населеных пунктаў Сінькоўка і Кіслоўка Харкаўскай вобласці спыненыя дзеянні трох украінскіх дыверсійна-разведвальных груп.
За суткі на гэтым напрамку знішчаныя звыш 30 украінскіх вайскоўцаў, два аўтамабілі, а таксама самаходныя артылерыйскія ўстаноўкі Krab і Paladin.
— На Чырвона-Ліманскім напрамку ўдарамі авіяцыі, агнём артылерыі групоўкі войскаў «Цэнтр» нанесенае паражэнне падраздзяленням УСУ ў раёнах населеных пунктаў Чырвонапапоўка, Неўскае і Чырвоная Дзіброва Луганскай вобласці, Грыгораўка і Церны Данецкай вобласці. За суткі на гэтым напрамку знішчаныя больш за 80 украінскіх вайскоўцаў, 4 баявыя браніраваныя машыны, 3 аўтамабілі, а таксама гаўбіца Д-20.
— На Данецкім напрамку ў раёне Арцёмаўска (Бахмут. — Заўв. рэд.) штурмавыя атрады ПВК Вагнера авалодалі трыма гарадскімі кварталамі. Падраздзяленні Паветрана-дэсантных войскаў скоўвалі дзеянні ўкраінскіх вайскоўцаў на флангах штурмавых атрадаў. Ударамі авіяцыі, ракетных войскаў і агнём артылерыі Паўднёвай групоўкі войскаў пабітыя рэзервы праціўніка, якія спрабавалі прабіцца ў Арцёмаўск з боку населеных пунктаў Часаў Яр і Багданаўка, а таксама падраздзяленні 28-й механізаванай брыгады УСУ ў раёне населенага пункта Канстанцінаўка Данецкай вобласці.
За мінулыя суткі ў гэтым раёне расійская авіяцыя ажыццявіла 8 вылетаў, ракетныя войскі і артылерыя групоўкі выканалі 52 агнявыя задачы. Страты УСУ склалі больш за 245 украінскіх вайскоўцаў, адзін танк, бронетранспарцёр, дзве баявыя браніраваныя машыны, тры пікапы, восем аўтамабіляў, гаўбіца «Мста-Б», дзве гаўбіцы Д-20, а таксама тры пускавыя ўстаноўкі РСЗА «Град».
— На Паўднёва-Данецкім і Запарожскім напрамках ударамі авіяцыі і агнём артылерыі групоўкі войскаў «Усход» нанесенае паражэнне падраздзяленням УСУ ў раёнах населеных пунктаў Вуглядар Данецкай вобласці, Гуляйполе і Арэхаў Запарожскай вобласці. У раёне населенага пункта Арэхаў Запарожскай вобласці знішчаны склад боепрыпасаў 65-й механізаванай брыгады УСУ.
У раёнах населеных пунктаў Паўлаўка і Навасёлка Данецкай вобласці спыненая дзейнасць дзвюх дыверсійна-разведвальных груп УСУ. За суткі на гэтых напрамках знішчаныя да 180 украінскіх вайскоўцаў, 11 аўтамабіляў, а таксама гаўбіца Д-30.
— На Херсонскім напрамку ў выніку агнявога паражэння за суткі знішчаныя да 50 украінскіх вайскоўцаў, тры баявыя браніраваныя машыны і шэсць аўтамабіляў. Акрамя таго, у раёне населенага пункта Атрадакаменка Херсонскай вобласці знішчаны склад вайскова-тэхнічнай маёмасці 121-й брыгады тэрытарыяльнай абароны.
Усяго, паводле МА РФ, за суткі нанесенае паражэнне 94 артылерыйскім падраздзяленням, жывой сіле і тэхніцы УСУ ў 117 раёнах. У раёне населенага пункта Чырвоны Ліман Данецкай вобласці збіты Су-24 Паветраных сіл Украіны. Перахопленыя два рэактыўныя снарады сістэмы залпавага агню HIMARS, знішчаныя пяць украінскіх беспілотных лётных апаратаў.
Інстытут па вывучэнні вайны: Крэмль аб’ядноўвае савецкія метады кантролю з тэхналогіямі XXI стагоддзя
«Інструментам лічбавага аўтарытарызму» назвалі ў амерыканскім Інстытуце па вывучэнні вайны прыняты напярэдадні ў Расіі закон пра стварэнне адзінага электроннага рэестра грамадзян РФ, якія падлягаюць прызыву на вайсковую службу. Позвы расійскім прызыўнікам ваенкаматы будуць адпраўляць у электронным выглядзе. Тыя, хто атрымаў позву, будуць абавязаныя з’явіцца ў ваенкамат цягам 20 дзён з моманту прызыву, ім таксама будзе забаронены выезд за межы РФ. Тыя, хто не з’явіцца ў тэрмін, страцяць права кіраваць транспартнымі сродкамі, купляць або прадаваць нерухомасць, браць крэдыты — да з’яўлення ў ваенкамаце.
У Дзярждуме заявілі, што новаўвядзенні мусяць выправіць «некаторыя бюракратычныя недахопы», якія ўзніклі падчас частковай мабілізацыі ў Расіі ў верасні 2022 года. Як адзначаюць у Інстытуце, ISW раней прагназаваў, што Крэмль аб’яднае меры грамадскага кантролю ў савецкім стылі з тэхналогіямі big data і інфармацыйнымі тэхналогіямі ХХІ стагоддзя, каб узмацніць кантроль над насельніцтвам Расіі.
Звяртаюць эксперты ўвагу і на тое, што Міністэрства абароны Расіі і Яўген Прыгожын прызналі ролю адно аднаго ў баях за Бахмут. Мінабароны Расіі і Прыгожын заявілі, што вагнераўцы складаюць асноўную ўдарную сілу ў баях за тэрыторыі і адцясненне ўкраінскіх вайскоўцаў у цэнтральным Бахмуце, у той час як падраздзяленні ПДВ Расіі забяспечваюць ім падтрымку на флангах, у тым ліку ў раёне Жалязнянскага, Сака і Ванцэці, Мікалаеўкі.
Гэты расклад сіл дапускае, што Мінабароны РФ збіраецца выкарыстоўваць ПВК Вагнера для захопу Бахмута, звёўшы да мінімуму страты сярод расійскіх вайскоўцаў, кажуць эксперты. Яны таксама лічаць, што ў выніку перамогу расійскае Міністэрства абароны прыпіша сабе.
Паводле ацэнкі ISW, расійскія сілы занялі не менш за 30,68 квадратных кіламетра, або 76,5% Бахмута.
На што яшчэ звярнулі ўвагу эксперты:
- невялікая група праваенных расійскіх блогераў заклікала расійскі ўрад скасаваць законы аб цэнзуры, скіраваныя супраць дыскрэдытацыі расійскіх вайскоўцаў;
- расійскія сілы, відаць, утрымліваюць пазіцыі на паўночны ўсход ад Купянска і дамагліся поспехаў у лясным масіве на поўдзень ад Крамянной;
-
- расійскія войскі правялі наземныя атакі ў Бахмуце і яго ваколіцах, а таксама ўздоўж лініі Аўдзееўка — Данецк;
- расійскія войскі вялі абарончыя аперацыі на поўдні Украіны;
- міністр абароны Расіі Сяргей Шайгу наведаў прадпрыемствы абаронна-прамысловага комплексу Тульскай вобласці ў рамках пастаяннай работы па дэманстрацыі ўстойлівасці расійскага абаронна-прамысловага комплексу;
- упаўнаважаная па правах дзіцяці ў Расіі Марыя Львова-Бялова працягвае пацвярджаць, што расійскія ўлады ажыццяўляюць шэраг дзеянняў у дачыненні да ўкраінскіх дзяцей, спрабуючы зняць з сябе ордар Міжнароднага крымінальнага суда (МКС) на яе арышт.