У Міністэрстве абароны Расіі заявілі, што ў выніку начных удараў знішчылі ў Львоўскай вобласці сховішча паліва для ўкраінскай ваеннай тэхнікі. Ва ўкраінскім Генштабе расказалі, што з прычыны вялікіх стратаў расіяне ўсё часцей выкарыстоўваюць цывільныя бальніцы на акупаваных тэрыторыях для лячэння сваіх салдат і наймітаў з ПВК Вагнера. У амерыканскім Інстытуце па вывучэнні вайны адзначаюць, што ўкраінскія сілы перахапілі ініцыятыву і дамагліся тактычна значных поспехаў у раёне Бахмута.
Расказваем пра галоўнае са зводак штабоў і высноваў экспертаў на 450-ы дзень вайны ва Украіне.
Генштаб УСУ: Нанеслі сем удараў па раёнах канцэнтрацыі асабовага складу і тэхнікі праціўніка
За мінулыя суткі расійскія войскі нанеслі 39 ракетных і 39 авіяцыйных удараў, а таксама правялі 50 абстрэлаў з рэактыўных сістэм залпавага агню. Імавернасць далейшых ракетных і авіяцыйных удараў па ўсёй тэрыторыі Украіны застаецца вельмі высокай, паведамляе Генштаб УСУ ў ранішняй зводцы.
— Праціўнік працягвае засяроджваць асноўныя намаганні на Ліманскім, Бахмуцкім, Аўдзееўскім і Мар'інскім напрамках — за суткі на названых участках фронту адбылося 29 баявых сутыкненняў. Самыя гарачыя баі вядуцца за Бахмут і Мар'інку.
— На Северскім і Слабажанскім напрамках расійскія войскі з мінамётаў і артылерыі абстралялі 13 населеных пунктаў Чарнігаўскай і Сумскай абласцей, а таксама на Харкаўшчыне.
— На Купянскім напрамку артылерыйскім і мінамётным абстрэлам падвергліся 11 населеных пунктаў Харкаўскай і Луганскай абласцей.
— На Ліманскім напрамку праціўнік нанёс авіяцыйныя ўдары ў раёне населенага пункта Белагораўка. Артылерыйскім абстрэлам падвергліся чатыры населеныя пункты ў Луганскай і Данецкай абласцях.
— На Бахмуцкім напрамку працягваюцца цяжкія баі за горад Бахмут. Акрамя таго, расійскія войскі спрабавалі наступаць у кірунку населенага пункта Іванаўскае. Нанеслі авіяўдары па раёнах трох населеных пунктаў, абстралялі — 10.
— На Аўдзееўскім напрамку праціўнік правёў наступальныя дзеянні ў кірунку населеных пунктаў Севернае і Першамайскае, але поспеху не меў. Нанёс авіяўдары ў раёнах Новакалінава і Аўдзееўкі. З артылерыі абстраляў сем населеных пунктаў.
— На Мар'інскім напрамку падраздзяленні Сіл абароны адбілі шматлікія атакі расійскіх сіл у раёне горада Мар'інка, а таксама атаку ў кірунку Новаміхайлаўкі. Расійская артылерыя абстраляла тры населеныя пункты.
— На Шахцёрскім напрамку за мінулыя суткі праціўнік наступальных дзеянняў не праводзіў. Нанёс авіяўдары паблізу населеных пунктаў Залатая Ніва і Вялікая Навасёлка. Абстраляў чатыры населеныя пункты.
— На Запарожскім і Херсонскім напрамках расійскія войскі працягваюць весці абарончыя дзеянні. Нанеслі авіяўдар па населеным пункце Наваполь Данецкай вобласці. Абстралялі 11 населеных пунктаў Данецкай і Запарожскай абласцей, а таксама горад Херсон.
— Авіяцыя Сіл абароны за мінулыя суткі нанесла сем удараў па раёнах канцэнтрацыі асабовага складу і ваеннай тэхнікі праціўніка.
— Знішчаная 21 крылатая ракета, а таксама восем БПЛА праціўніка рознага тыпу.
— Падраздзяленні ракетных войскаў і артылерыі пабілі раён канцэнтрацыі ўзбраення і ваеннай тэхнікі, склад боепрыпасаў, тры артылерыйскія падраздзяленні на агнявых пазіцыях, зенітна-ракетны комплекс, сем станцый радыёэлектроннай барацьбы і радыёлакацыйную станцыю расійскіх войскаў.
У Генштабе таксама заявілі, што расіяне працягваюць несці вялікія страты і ўсё часцей выкарыстоўваюць цывільныя медыцынскія ўстановы акупаваных населеных пунктаў ва ўласных мэтах. У прыватнасці, у Луганску чыгуначная бальніца выкарыстоўваецца як ваенны шпіталь, дзе лечаць параненых вайскоўцаў і наймітаў ПВК Вагнера.
Мінабароны РФ: Перахапілі сем снарадаў РСЗА HIMARS
«Сёння ноччу Узброеныя сілы Расійскай Федэрацыі нанеслі ўдар высокадакладнай зброяй вялікай далёкасці марскога базавання па пунктах дыслакацыі і цэнтрах падрыхтоўкі падраздзяленняў УСУ, а таксама складах боепрыпасаў, узбраення і тэхнікі замежнай вытворчасці. Мэта ўдару дасягнутая. Усе прызначаныя аб’екты пабітыя. У выніку ўдараў парушаныя: забяспечанне, падрыхтоўка і фармаванне рэзерваў украінскіх войскаў для выканання задач у раёнах баявых дзеянняў, — адрапартавалі ў Міністэрстве абароны Расіі.
— На Купянскім напрамку ўдарамі авіяцыі і агнём артылерыі Заходняй групоўкі войскаў пабітыя падраздзяленні УСУ ў раёнах населеных пунктаў Двурэчная, Навамлынск, Кіслоўка і Бераставое Харкаўскай вобласці. У раёнах населеных пунктаў Цімкаўка, Сінькоўка Харкаўскай вобласці і Розаўка Луганскай вобласці спыненыя дзеянні трох украінскіх дыверсійна-разведвальных груп.
Страты УСУ за суткі склалі да 65 вайскоўцаў, два аўтамабілі, а таксама самаходная артылерыйская ўстаноўка «Гваздзік». Акрамя таго, у раёне населенага пункта Цішчанкоўка Харкаўскай вобласці знішчаны склад боепрыпасаў 14-й механізаванай брыгады УСУ.
— На Чырвона-Ліманскім напрамку авіяцыяй, агнём артылерыі і цяжкіх агнямётных сістэм групоўкі войскаў «Цэнтр» нанесенае паражэнне падраздзяленням УСУ ў раёнах населеных пунктаў Неўскае, Чырвоная Дзіброва Луганскай і Грыгораўка Данецкай абласцей. Знішчаныя да 85 украінскіх вайскоўцаў, тры баявыя браніраваныя машыны, самаходная артылерыйская ўстаноўка «Гваздзік», а таксама гаўбіцы «Мста-Б» і Д-30.
— На Арцёмаўскім (Бахмуцкім) тактычным напрамку штурмавыя атрады вялі баі ў заходняй частцы Бахмута. Падраздзяленні Паўднёвай групоўкі войскаў стрымлівалі праціўніка, прыкрываючы флангі штурмавых атрадаў. Авіяцыяй і артылерыяй Паўднёвай групоўкі войскаў нанесенае паражэнне жывой сіле і тэхніцы УСУ ў раёнах населеных пунктаў Калінаўка, Часаў Яр і Краснае Данецкай вобласці.
Падчас баёў знішчаныя больш за 70 украінскіх вайскоўцаў і добраахвотнікаў, дзве баявыя машыны пяхоты, адзін бронетранспарцёр, тры пікапы, самаходная артылерыйская ўстаноўка «Гваздзік», а таксама дзве радыёлакацыйныя станцыі контрбатарэйнай барацьбы AN/TPQ-50.
— На Данецкім напрамку ў выніку актыўных дзеянняў падраздзяленняў, удараў авіяцыі і агню артылерыі Паўднёвай групоўкі войскаў знішчаныя да 130 украінскіх вайскоўцаў, дзесяць аўтамабіляў, а таксама адна буксаваная гаўбіца L118. У раёне населенага пункта Бакавое самаабвешчанай Данецкай Народнай Рэспублікі знішчаны склад ракетна-артылерыйскага ўзбраення.
— На Паўднёва-Данецкім і Запарожскім напрамках ударамі авіяцыі і агнём артылерыі групоўкі войскаў «Усход» нанесенае паражэнне падраздзяленням УСУ ў раёнах населеных пунктаў Шаўчэнка і Навасёлка Данецкай вобласці, Малая Такмачка і Новаданілаўка Запарожскай вобласці.
За суткі на гэтых напрамках знішчаныя да 120 украінскіх вайскоўцаў, тры баявыя браніраваныя машыны, а таксама дзве гаўбіцы Д-30. У раёне населенага пункта Канстанцінаўка Данецкай вобласці знішчаны склад боепрыпасаў 72-й механізаванай брыгады УСУ.
— На Херсонскім напрамку ў выніку агнявога паражэння страты УСУ за суткі склалі да 30 вайскоўцаў, тры аўтамабілі, а таксама гаўбіца Д-20.
Усяго за суткі, паводле МА РФ, пабітыя 76 артылерыйскіх падраздзяленняў, жывая сіла і ваенная тэхніка УСУ ў 103 раёнах. У раёне населенага пункта Чырвонаармейск Данецкай вобласці пабіты склад артылерыйскіх боепрыпасаў УСУ. У раёне населенага пункта Мервічы Львоўскай вобласці знішчанае сховішча паліва для ўкраінскай ваеннай тэхнікі. Сродкамі СПА перахопленыя сем рэактыўных снарадаў сістэмы залпавага агню HIMARS. Знішчаныя 10 украінскіх беспілотных лётных апаратаў.
Інстытут па вывучэнні вайны: «Вагне» страчвае ініцыятыву на полі бою
Украінскія сілы перахапілі ініцыятыву і дамагліся 18 траўня тактычна значных поспехаў у раёне Бахмута, гаворыцца ў свежай справаздачы амерыканскага Інстытута па вывучэнні вайны. Як адзначаюць эксперты, гэтыя аперацыі — працяг лакальных контратак, якія ўкраінскія сілы праводзяць ужо некалькі дзён, але яны не азначаюць пачатку новай буйной наступальнай аперацыі.
Многія расійскія блогеры сцвярджалі, што ўкраінскія сілы прарваліся з паўночнага захаду праз расійскія абарончыя рубяжы на поўдзень і паўднёвы захад ад Іванаўскага (6 км на захад ад Бахмута) і на паўночны захад ад Кляшчэеўкі (6 км на паўднёвы захад ад Бахмута). Ваенкары таксама сцвярджалі, што расійскія войскі адступілі з пазіцый паўночней населенага пункта Сака і Ванцэці (15 км на поўнач ад Бахмута) на поўдзень, але ўкраінскія сілы яшчэ не ўвайшлі ў населены пункт. Яўген Прыгожын заявіў, што расійскія войскі аддалі 570 метраў тэрыторыі на поўнач ад Бахмута, што супадае з заявай намесніцы міністра абароны Украіны Ганны Маляр пра тое, што ўкраінскія сілы прасунуліся на 500 метраў на поўнач ад Бахмута і на 1000 метраў на поўдзень ад Бахмута. Афіцыйны прадстаўнік УСУ, палкоўнік Сяргей Чараваты заявіў, што за мінулыя суткі ўкраінскія сілы прасунуліся на 1700 метраў, а 3-я асобная штурмавая брыгада Украіны паведаміла, што контратакі брыгады пашырылі ўкраінскі плацдарм у раёне Бахмута да 2000 метраў у шырыню і 700 метраў у глыбіню.
Абмежаваны характар наступальных аперацый «Вагнера» ў Бахмуце ў параўнанні з лакальнымі ўкраінскімі контратакамі пацвярджае страту расійскімі сіламі ініцыятывы ў гэтым раёне, кажуць у ISW. Расія вымушаная рэагаваць на ўкраінскія дзеянні і перакідваць падраздзяленні ПДВ на флангі Бахмута для абароны ад украінскага наступу, вельмі імаверна, што на шкоду іншым раёнам лініі фронту.
Уладальнік ПВК Вагнера Яўген Прыгожын 18 траўня прызнаў, што яго найміты не могуць акружыць украінскія сілы ў Бахмуце праз страту ўстойлівых флангаў на поўнач і поўдзень ад Бахмута. Прыгожын абвінаваціў у страце выгадных пазіцый Мінабароны Расіі. Эксперты нагадваюць, што Прыгожын са сваёй ПВК збіраўся акружыць Бахмут і завабіць у пастку ўкраінскія войскі, але аказаўся не ў стане гэта зрабіць. Прыгожын, імаверна, чакаў, што ўкраінскія войскі цалкам выйдуць з Бахмут, баючыся немінучага акружэння, і нават прапанаваў прэзідэнту Уладзіміру Зяленскаму дазволіць вывесці ўкраінскія войскі з горада 3 сакавіка. Аднак украінская абарончая аперацыя аддавала прыярытэт абароне ўкраінскіх наземных камунікацый на захад ад Бахмута, што змушала сілы «Вагнера» весці баявыя дзеянні ў гарадскіх умовах і прабівацца проста праз сам горад. Прызнанне Прыгожына яшчэ раз пацвярджае заявы ўкраінскіх афіцыйных асобаў пра тое, што «Вагнер» страчвае ініцыятыву на полі бою, канстатуюць эксперты.
Прыгожын і звязаныя з ім блогеры ў няўдачах у Бахмуце абвінавачваюць Мінабароны Расіі. У адказ некаторыя ультранацыяналісты абвінавачваюць Прыгожына ў выкарыстанні бітвы за Бахмут для задавальнення асабістых амбіцый: у паляпшэнні свайго фінансавага становішча за кошт вайны, захаванні сваіх сіл за кошт іншых падраздзяленняў, а таксама жаданні папіярыцца. Гэтая крытыка характэрная тым, што можа сведчыць пра змену ўспрымання Прыгожына сярод ультранацыяналістаў, адзначаюць у Інстытуце.
На што яшчэ звярнулі ўвагу эксперты:
- расійскія войскі правялі абмежаваныя наземныя атакі на паўночны ўсход ад Купянска і на рубяжы Сватава — Крамянная;
- расійскія сілы правялі абмежаваныя наземныя атакі на лініі Аўдзееўка — Донецк;
- невядомыя — магчыма, украінскія — партызаны атакавалі расійскую чыгунку ў Крыме;
- 18 траўня Вярхоўны суд Расіі пастанавіў, што расійскія вайскоўцы, якія добраахвотна здаліся на полі бою, будуць прыцягнутыя да адказнасці па абвінавачванні ў дзяржаўнай здрадзе;
- Крэмль працягвае ўзмацняць унутраныя рэпрэсіўныя захады, якія, імаверна, заахвочваюць самацэнзуру і рыхтуюць расійскае грамадства да зацяжной вайны;
- генеральны сакратар NATO Енс Столтэнберг заявіў, што NATO можа абмеркаваць магчымасць перадачы Украіне заходніх знішчальнікаў на чэрвеньскай сустрэчы міністраў абароны.