Уначы 10 верасня ў паветранай прасторы Расіі збілі 144 украінскія беспілотныя лётныя апараты, паведамілі ў Мінабароны РФ.
Дроны самалётнага тыпу былі выяўленыя «дзяжурнымі сродкамі СПА, знішчаныя і перахопленыя», заявілі ў расійскім вайсковым ведамстве.
72 БПЛА «прызямлілі» над тэрыторыяй Бранскай вобласці, 20 — над Маскоўскай вобласцю, 14 — над Курскай, 13 — над Тульскай, восем — над Белгародскай, сем — над Калужскай, пяць — над Варонежскай, чатыры — над Ліпецкай і адзін — над Арлоўскай.
Губернатар Маскоўскай вобласці Андрэй Вараб’ёў паведаміў, што ў выніку атакі беспілотнікі трапілі ў шматкватэрныя дамы ў Раменскім, пачаўся пажар. Загінула 46-гадовая жанчына. Як адзначае «Подъем», яна стала першай загінулай пасля ўдару беспілотніка мірнай жыхаркай у рэгіёне. Яшчэ чатыры чалавекі атрымалі раненні.
У сваю чаргу ў Паветраных сілах Украіны паведамілі, што ў ноч на аўторак краіну атакавалі 46 беспілотнікаў, балістычная ракета «Іскандэр-М» і супрацьрадыёлакацыйная ракета Х-31П.
«Паветраным сілам удалося збіць 38 дронаў. Яшчэ тры беспілотнікі выйшлі з падкантрольнай паветранай прасторы Украіны, адзін з іх у кірунку Расіі, два іншыя — у кірунку акупаваных тэрыторый Луганскай вобласці. Яшчэ тры варожыя БПЛА лакальна страчаныя на тэрыторыі Украіны (меркавана ўпалі пад уздзеяннем сродкаў РЭБ)», — гаворыцца ў паведамленні Паветраных сіл Украіны.