Лідарка беларускіх дэмакратычных сіл Святлана Ціханоўская пракаментавала смерць Аляксея Навальнага. Яна ўпэўненая: гэтая смерць — чарговы доказ таго, што для дыктатараў чалавечае жыццё не мае ніякай каштоўнасці.
«Рэжым Пуціна, як і рэжым Лукашэнкі, у імкненні захаваць уладу пазбаўляецца ад апанентаў любымі спосабамі. У Беларусі проста цяпер дзясяткі палітвязняў знаходзяцца ў рэжыме інкамунікада — жыцці Мікалая Статкевіча, Машы Калеснікавай, майго мужа Сяргея і іншых цяпер знаходзяцца пад прамой пагрозай. Вітольд Ашурак, Вадзім Храсько, Алесь Пушкін, Мікалай Клімовіч ужо памерлі ў зняволенні. А яшчэ сотні людзей утрымліваюцца ў нечалавечых умовах і без усялякай дапамогі», — нагадала Ціханоўская.
Лідарка дэмсіл адзначыла, што Навальнага, як і многіх беларускіх палітвязняў, неаднаразова адпраўлялі ў ШІЗА — у лютым гэта зрабілі 27-ы раз: «Мы ўсе бачылі на фота, як такія ўмовы ўтрымання адбіліся на яго стане. Менавіта таму ў мяне няма сумневу ў тым, што Навальнага мэтаскіравана забіў пуцінскі рэжым».
«Я выдатна разумею, як ад гэтай навіны сціскаецца сэрца ўсіх, чые блізкія цяпер знаходзяцца ў турме. Юлія Навальная і іх з Аляксеем дзеці сёння атрымалі самую страшную навіну, якую мы баімся атрымаць пра тысячы нашых любімых. Я выказваю шчырыя спачуванні сям'і, блізкім і калегам Аляксея Навальнага. Маё сэрца сёння з вамі», — сказала яна.
Нагадаем, 16 лютага ФСВП Расіі паведаміў пра смерць палітвязня Аляксея Навальнага. У паведамленні гаворыцца, што ён памёр у калоніі пасля прагулкі. Следчы камітэт РФ арганізаваў працэсуальную праверку па факце смерці апазіцыянера.