Пад Харкавам каля двух тыдняў таму загінуў былы спецназавец з Беларусі Руслан Нікіцін, які паехаў ва Украіну ваяваць на баку Расіі, паведамілі ягоныя аднакласнікі ў сацыяльных сетках, піша «Наша Ніва».
Як стала вядома выданню, Нікіцін нарадзіўся ў Лідзе і скончыў школу № 9. Тэрміновую службу праходзіў у разведцы спецназа ў 5-й асобнай брыгадзе спецыяльнага прызначэння. Яго знаёмыя сцвярджаюць, што ён даўно ажаніўся з расіянкай, паехаў жыць на яе радзіму і нават атрымаў расійскі пашпарт.
Яны таксама сцвярджаюць, што ваяваць мужчына пайшоў з уласнай ініцыятывы. На фота з фронту відаць, што побач з нашыўкай Z ён насіў і нашыўку з чырвона-зялёным сцягам.
Паводле версіі знаёмых, Нікіцін загінуў пад Харкавам 16 траўня, калі ратаваў таварышаў па службе. Нагадаем: раніцай 10 траўня расійскія ваенкары пачалі распаўсюджваць інфармацыю пра пачатак наступу расійскіх войскаў на Харкаў з тэрыторыі Расіі, але праз два тыдні прызналі, што расіяне часткова перайшлі да абароны.
У загінулага засталіся маці ў Беларусі і жонка з сынам у Расіі.
Спачуванні ім выказаў вакаліст гурта Skynet Іван Панамароў, які расказаў у Instagram, што сябраваў з Нікіціным і той нават натхніў яго на напісанне песні «Я жив». Пасля смерці Нікіціна артыст прысвяціў Руслану верш.